الاثنين، 21 يناير، 2013

لو كُنتُ طيراً ..



لو كُنتُ طيراً .. كُنتُ سأزور كل البلاد .. في أي وقت دون أن أحمل هم التأشيرةِ,أو تذاكر السّفرِ, أو زاد الرّحيل ...

كنتُ سأتّخذُ في كلِّ أرض صديق .. من البشر, والحيوانات, والزهور, والنّسمات ..

كُنتُ سأشاهد كل المخلوقات ..

كنتُ سأزور وطني متى أشاء ..

كُنتُ سأشُقُّ عَنان السّماء .. وأنزل في سحيق الأَرض 
سأُسابِقُ الريح والنسيم 
سأقف على كلِّ الأشجارِ والأزهار ..

كُنتُ سأُغَرِّد معَ سربِ الحقيقة
وكُنتُ سأُغَرِّد خارج سِرب الخنوع والذُّل والعبودية لغير خالقي وبارِئي ..
سأُغَرِّد ولو وحدي .. وسيكون صوتي جميلاً يُطرِبُ الأسماع ..

كُنتُ سأنقُر رؤوسَ الظالمين .. وأرمهم بالحجارة والحصى .. حتى يموتوا.. أو يصيبهم الجُنون..

كُنتُ سأرتوي من ماء المطر.. أو النبع أو النّهر 
سأُرفرف بجناحيّ المليئين بالماء فوق جموعِ الثَّائرين والمجاهدين
لأُخَفِّف عنهم الحرَّ .. وبطشَ الظالمين 
لِأُخبِرَهَم أنّهم ليسوا وحدهم .. وأن رَبَّهم معهم .. وسينصُرُهم على كلِّ الظالمين ..والطُّغاةِ والجبَّارين ...

كُنت سأنشُرُ بذور القمحِ على الفقراء والمحتاجين ..

كُنتُ سأنشُرُ الرَّحيق في كُلِّ مكان 
 وأحملُ بذور الخَيرِ والأَمَل والحُبِّ والتفاؤل من كُلِّ مكان.. وإلى كُلِّ مكان .. 

كُنتُ سأحرُسُ الغار ..وأُرافقَ سيّد العالمين ..

كُنتُ سأزورُ الحَرَمَ في كُلِّ يوم .. أُطوفُ مع الطوّافين.. أُصلّي مع المُصَلّين .. وأدعو مع الدّاعين ..

كُنتُ سأزورُ غزّة .. ورام الله.. وحيفا .. ويافا .. وتلّ الربيع ..والضَفَّة .. والقُدس 
كُنتُ سأُباركُ المجاهدين وأُخبرهم بمعيّةِ الله
 وسأُصَلِّي في الأقصى رغْمَ أنفِ المُحتلّين الغاصبين..

لَو كُنت طيراً  .. ولَكِنني لستُ طيراً .. ولا أقْدِرُ أن أصير طيراً 
ولكِنني أقدِرُ على أفعالِ الطيور .. و سأفعلُها :)

الخميس، 8 نوفمبر، 2012

عَن الكلمات .. واللحظات

عن لحظات تأبي أن تتركنا أو ننساها ..

عن لحظة صمتٍ امتلأت بكلمات آثرت الاختباء في قلب صاحبها ..

عن أنينٍ مكتوم يكافح لأجل الظهور

عن قطراتٍ دافئة تلامس الوجه واحدة تلو الأخرى في ليلة ساكنة ..

عن ذاكرةٍ تأبى النسيان..

عن كلمات تذكرنا بلحظات فرحنا فنبتسم.. وأخرى تذكرنا بلحظات حزننا فنبتسم لأنها رحلت بغير رجعة :)

عن بيوتٍ صارت رماديّة حين غادرها ساكنيها ..

عن بيت الجدّة وبيت الجدّ .. والاستغماية و "عبد العال" والبمب والصواريخ, والضحك حتى التعب

عن لقاء بعد غيابٍ لسنين .. عن مكالمة غير متوقّعة

عن صديقة فرّقتنا السنين , ظننتها نسيَت ولكنّها لم تنسَ ..

عن دفْء الأسرة حين نتجمّع ..
عن دفْءِ الأوطان ..
عن دفْء الأصدقاء ..

عن أنوار أرض الوطن الظاهرة من شباك الطائرة , أو شباك السفينة :)

عن رائحة البحر وصوت الموج والسير على الرّمال ..

عن شروق الشمس ونسماتِ الفجر وصوت العصافير

عن شعورك أن الله معك في كل خطواتك ..

عن شعورك بعنايته وإحاطته ولطفه ورحمته بك :)

عن الحُبّ ..

عمّن نُحِبّ ..

عن عاطفة تخرج بعفوية ..

عن الأمل

عن الثورة

عن الحلم

عن الفرح

عنهم ..

عن ما أريد ..

عن من أكون ..

عن من أريد أن أكون ..

عن كلماتٍ غير مرتبة , محمّلة بالمعاني الجميلة

عن حركات عشوائية ورقصات مضحكة للتعبير عن الفرح ..

عن النجاح ولذّة التعب لأجله ..

عن كلمات لا تُهم أحداً .. سواي :)

عنكم وعن ما تُحبّون .. دُمتم بخير :)


الثلاثاء، 7 أغسطس، 2012

خاطرة رمضانية .. حديث مع النفس



يا نفسُ لمَ تفرحين بوجهٍ جميلٍ سوفَ يغْمُرُه الناس في التراب غير مميزين..!

يا نفسُ لمَ تفخرين بعلمٍ لم تكوني لتبلغيه إلا أن علّمكِ إيّاه ربُّ العالمين ..!

يا نفسُ لمَ تستكبرين بعملٍ صالحٍ إن لم يقبله الله منكِ لصارَ كالرماد تذروه الريّاح في كل حين ..!

يا نفسُ لمَ تفرحين بذكرٍ حسنٍ قد ذُكِرتي به ولم تكوني لتسمعيه لولا أن الله ستر كل قُبحٍ تكتمين  ..! 

يا نفسُ لا تنسي أنّك للأرض سوفَ تعودين ..

وبين يديّ ربِّكِ سوف تقفين ..

بلا أي مال أو مُلك وبدون الناس أجمعين ..

ستقفين وليس معكِ سوى حصاد السنين ..

فهل أحسنتِ ما تزرعين .. ؟! 

الاثنين، 9 يوليو، 2012

لماذا لم أؤلف كتاب؟؟

ملاحظة : هذا الكلام فضفضة شخصية ملوش اي أهمية في الكون لو حضرتك مش حابب تقراه براحتك يعني :))


طبعاً بما إني شخص مهم جداً بالنسبة لنفسي كنت بسألها كتير أوي عن سبب تراجعها عن فكرة كتابة كتاب , ونظراً لضغطي على نفسي في الاجابة قررت انها ترد عليّا بصدر رحب وتقولي أسبابها :

1- أنا لو نزّلت كتاب هقرر اسحب النسخ اللي موجودة منه في السوق كل أسبوع عشان كل شوية هكتشف ان فيه حتة مش عاجباني زي ما بعمل في اي موضوع او تدوينة بنشرها تقريبا , أو حتى خواطري اللي بحتفظ بيها , معرفش هل ده اسمه تردد وعدم ثقة بالنفس ولا ده طموح دايما اني اكون أفضل؟ مع إني ساعات بقول لنفسي ما جايز اني انزل حاجة للناس دي هتحطني قدام الأمر الواقع ومش هغيّر فيها حاجة ! بس انا اثبتت لنفسي أكتر من مرة انها مبتفرقش خالص .

2- لو كتبت كتاب مش هيكون عن موضوع معين وهيبقى مليان تخبّط وعشوائية وعدم تركيز ,لأنني ببساطة مبعرفش اركّز تقريبا وأي حاجة بركّز فيها جامد بتطلع وحشة جدا ومش مرتبطة ببعض ومش بتعجبني في الاخر ولا بتعجب ناس كتير, انما الحاجات اللي بكتبها بعشوائية وتلقائية بتطلع أفضل "حسب راي الناس" , عارفة ان حد هيرد يقولي (ماهو مش شرط كل اللي تكتبيه يعجب الناس ) وانا معاه طبعا بس هو كمان مش بيبقى عاجبني انا شخصيا مش بس الناس ! ومعرفش برضه ده السبب اللي بيخلي الحاجة متعجبش الناس -إن انا نفسي مش عاجباني- ولا لأ , ثقة الانسان بنفسه بتوصل للناس وبتخليهم يشوفوا حاجات ممكن تكون وحشة انها حلوة جدا لمجرد ثقة اللي عملها بنفسه

3- لو كتبت كتاب عشوائي مواضيعه مش مترابطة مفيش ناس كتير هتشتريه أصلا وتدفع فيه فلوس خصوصا في حاجة متعرفش محتواها من واحدة متعرفش هي مين (ده لو فيه دار نشر قررت تجازف وتنزله اصلا :D ) بيني وبينكم انا شخصيا مش هشتري كتاب كده الا لو كان اللي كاتب الكتاب حد اعرفه وبجامله او هنقسم الارباح سوا او معايا فلوس كتير معرفش اصرفها في ايه :D

4- حتى لو خلاص كتبت كتاب حلو وهنزله وهيعجب الناس معتقدش اني عندي الجرأة أصلا اني اطلع اتكلم عن كتابي كأنه حصيلة خبرة السنين وانه حاجة جامده وانا مليش اي هوية في المجتمع أصلا ! انا بصراحة بيعجبني ثقة الناس اللي زي حالاتي بنفسها لما تنزل كتاب وتبقى بتتكلم عنه بثقة وكده بصراحة عايزة ابقى زيهم بس حتى الان مش نافع ..

5- سبب أخير لعد كتابتي لكتاب إن غالبا كلامي نصه هيبقى غلط وهرجع فيه في يوم من الايام بما فيه الكلام اللي فوق ده كله !! وبصراحة وقتك أيها القارئ العزيز أثمن من اني اضيعه في كلام عن خيالاتي وأفكاري :D

نهاية ممكن اتراجع عن تراجعي عن تأليف كتاب لو حليت لنفسي كل المشاكل اللي كتبتها فوق , أو اني بقيت واحدة مشهورة جدا بحيث ان اي حاجة هكتبها الناس هتحبها وتهلل عشانها :D :D

وبسسسس  ^_^  نشكر لك أيها القارئ الصبور اللي استحمل يوصل لحد السطر ده سعة صدرك وروحك الحلوة :)))

الخميس، 19 أبريل، 2012

كلمتين عالماشي


قعدت اقلّب في كل اللي كتبته قبل كده في دفاتري وهنا على المدونة  لقيت ان أغلب كلماتي مبتورة , تلاقيني كتبت كام كلمة عن الموضوع بعدين فجأة انسى كل اللي بتكلم فيه =) كل الكلام بيخلص فجأة معرفش دي مشكلة من إيه بالظبط ؟ هل ده من ترددي ولا تشتتي وسرحاني ؟ مش عارفة الحقيقة , كل اللي اعرفه انها مشكلة وعايزة اخلص منها ومعرفش ازاي , اللي عارف يقولي ياريت .
أفكار كتير بتدور في دماغي وكلام تايه وسط الزحمة أول ما احاول اوقفها وانظمها بتجري وتكسر الاشارة , طب اعملها ايه دي يعني؟ مكتبش؟ مينفعش , ده مش حل أساساً . طب اعمل إيه؟ ولا حاجة اديني بحاول امسك اللي اقدر عليه منها . عندي قصص وأشعار وأفكار كلها بتلف في دماغي وتايهة , ولما افكر اكتبها ابصلها الاقيها معجبتنيش فمنشرهاش وموريهاش لحد واحتمال اقطعها كمان , ده غباء مني على فكرة الكتابة مش حاجة تكسف حتى لو بكتب وحش وإلا كده عمري ما هتعلم , وبعدين ناس كتير قدراتها متواضعة وبتكتب وثقتها في نفسها بتخليها تطور نفسها وبتخلي الناس تثق فيها كمان .
المهم .. هحاول ومش هزهق , لسة قدامي كتير هحاول اطور نفسي واقنعها تبطل الاستهبال اللي هي فيه ده .. وياريت اللي يقدر يساعدني فيكوا ميتأخرش .. سلامات بقى :))

الخميس، 12 أبريل، 2012

كرّاسة المصطلحات

حرية التعبير : هي أن يكون لمسؤول الحكومة كامل الحق أنّه "يعبّرك " أو إنه يسيبك منك للحيط


الديمقراطية : لك الحق أن تقول رأيك بكل حرية , وللضابط أن يقتلك بكل حريّة برضه

فوتوشوب : كلمة أعجمية تستخدم لتبرير سحل الفتيات وقتل المتظاهرين ودهس الأبرياء وكتابة بيانات المجلس العسكري على فيس بوك

الأغلبية الصامتة : هم قلّة من البشر لهم متحدث رسمي وبيانات ومؤتمرات كمان .

ميدان العباسيّة : هو ميدان يتظاهر فيه مجموعة من البشر اعتراضاً على التظاهر في مكان آخر .

المحلل الإستراتيجي : شخص شاف شغله وجع دماغ قرر إنه يسيبه ويوجع دماغ الناس

الناشط السياسي : شخص نشيط جدا جدا بيشتم كل السياسيين .

الشعب يريد : كلمة صهيونية متقولهاش تاني يا شاطر 

الثورة : وجهة نظر 

الثورة المضادة : هو اللي بنعمله في الناس هيطلع علينا ولا إييه 

************************
ملحوظة : التدوينة قديمة بعد الشيء وتسارع الأحداث في هذا البلد العجيب هيحسسك وانت بتقراها انها وثيقة من عهد الفراعنة :)

الأربعاء، 25 يناير، 2012

زي النهاردة من سنة ,, بداية كسر حاجز الخوف

مبدئيا أنا عارفة ممكن ذكرياتي متهمش حد في حاجة , لاننا منزلتش اساسا لإني مكنتش في مصر كنت  في السعودية, لكن انا عايزة اكتبها للتوثيق , وعشان افتكر احلى ايام حياتي بدون مبالغة , حتى وهي صعبة حلوة ,هكتب عن اهم الاحداث واحاسيسي وعن كل شيء في الايام دي ...

بداية يوم 25 يناير ,, كنت في امتحانات أولى ثانوي .كنت مستنية اليوم ده بفارغ الصبر معرفش ليه ,كنت بقول بلساني مش هيحصل حاجة جديدة زي كل مرة هينزلوا حبة هينضربوا ويتقبض عليهم ويروحوا , رغم ان ده كان كلامي بس قلبي كان بيقول حاجة تانية ,قلبي كان حاسس انه فيه حاجة كبيرة هتحصل وان احنا هنتغير , رحت المدرسة يومها الصبح كان عليا امتحانين (جغرافيا واملاء) سبت المراجعة وقعدنا نتكلم انا واصحابي عن اللي ممكن يحصل وعن توقعاتنا وعن امانينا اننا نكون في مصر في اللحظات دي واننا ننزل معاهم بقى , دخلنا الامتحان ورا التاني وانا دماغي في حتة تانية , روحت البيت جريت فتحت التلفزيون اشوف اللي حصل , اقلّب بين قنوات الاخبار , ولا حاجة عن مصر , اقلّب بين قنوات التلفزيون الحكومي , افلام واغاني وطنية بمناسبة قال ايه عيد الشرطة , اقلّب على القنوات المصرية الخاصة الاقي برامج طبخ وافلام عربي ومسلسلات , قلت ايه ده ! هو ايه اللي حصل هو محدش نزل؟؟ رحت فتحت فيس بوك قلت اشوف , الاقي صفحات كتييييييييييييير جدا - منهم لله كلهم - كاتبين التالي : مرة مجموعة شباب قرروا يعملوا ثورة زي تونس راحوا نزلوا لاقوا نفسهم حبة قليلين انضربوا واتقبض عليهم ومعملوش حاجة ,, قلت آه يبقى نزلوا واتلموا وخلاص (وقتها مكنتش عاملة لايك لكلنا خالد سعيد لأن ماما قالتلي ممكن يقبضوا عليكي ,اه والله قالتلي كده ) و بس رحت قفلت ولما اختي جت قلتها ده نزلوا وضربوهم وخلاص ,, قالتلي مش ممكن علطول كده , رحنا فتحنا تاني وشفنا صفحات سياسية  لقيناهم بيقولوا لسة محدش نزل لكن اول واحد نزل اتقبض عليه , حمدت ربنا ولقيت حمزة نمرة كاتب انه نازل قلت الراجل ده مش خايف هو مش عارف انه ممكن يتقبض عليه !!, وابتدى بعديها بشوية النزول , ساعتها كان موقع الدستور ابتدى يتابع الاخبار لحظة بلحظة ,ساعتها  ظهرت رصد كمان بتتابع الاخبار , ابتدت تتواتر الاخبار من (وحدة الرصد الميداني اللي هي شبكة رصد) وموقع الدستور اللي كان بيتابع الوقفات , كانت اول وقفه بتتابع بتاعة دار القضاء والقصر العيني , اما وقف محمد عبد القدوس وعبد المنعم ابو الفتوح وبلال فضل و محمد غنيم وحمزة نمرة ووائل غنيم ومحمد دياب وعبد الرحمن يوسف وناس كتير و اما انضرب عمرو سلامة  .

طبعا كنا نتابع الاخبار على قناة الجزيرة والعربية وبي بي سي العربية ولم تكن هناك اي قناة مصرية تغطي الاحداث , ابتدت الناس تزيد والمسيرات تكتر والقاهرة كلها عساكر لمنع الناس من التجمع , حدثت مناوشات كثيرة حتى تمكن المتظاهرين اخيرا من الوصول لميدان التحرير والاعتصام فيه . كان مشهد عمره ما حصل في مصر وعمري ما شفته , حسيت بحماسة غريبة وبدفعة امل لما شفت الناس متجمعة بقيت بقول : معقول الناس دي ممكن تمشي ؟؟
كان عليا اليوم اللي بعديها امتحان نحو ذاكرتلي كلمتين بالعافية ورجعت اتابع الاحداث , كنا كلنا متجمعين قدام التلفزيون والكمبيوتر بنتابع الاحداث كلنا سعداء ومتفاءلين وبندعي وبنتمنى ان المطالب تتحقق .

لا استطيع ان انسى دور بقية المحافظات التي اشتعلت فيها الثورة , لا استطيع نسيان رمز الصمود .. السويس الباسلة التي بدأت الثورة قبل أي مكان آخر , لا أنسى شكل المظاهرات في السويس بقيادة حافظ سلامة وصفت حجازي , السويس أول من بذلت الشهداء في سبيل مصر ,, رحم الله شهداءنا ورزقهم منازل الصديقين والنبيين والشهداء والصالحين .

لا استطيع ان انسى الاسكندرية والمنصورة وغيرهم من المحافظات التي انتفضت منذ البداية للمطالبة بالحرية والكرامة الانسانية والعيش .
كان هذا يوم الثلاثاء 25 يناير ,, وللحديث بقية ان شاء الله

أترككم مع بعض الصور والفيديوهات


كانت هذه الصورة في محافظتي الأم كفر الشيخ يوم 25 يناير :)

في محافظة قنا 25 يناير 2011


التحرير في أول اليوم 

القصر العيني 

حمزة نمرة أمام القصر العيني :)

مصطفى محمود ايام ما كان بتاع ثوار :-)

مسيرة ذاهبة لماسبيرو هتفت ضد مبارك 

الاسكندرية 

الى التحرير :)

بداية الاعتصام في التحرير :))


ده فيديو يوم 25 يناير عند دار الحكمة

وكفاية كده :))