ملاحظة : هذا الكلام فضفضة شخصية ملوش اي أهمية في الكون لو حضرتك مش حابب تقراه براحتك يعني :))
طبعاً بما إني شخص مهم جداً بالنسبة لنفسي كنت بسألها كتير أوي عن سبب تراجعها عن فكرة كتابة كتاب , ونظراً لضغطي على نفسي في الاجابة قررت انها ترد عليّا بصدر رحب وتقولي أسبابها :
1- أنا لو نزّلت كتاب هقرر اسحب النسخ اللي موجودة منه في السوق كل أسبوع عشان كل شوية هكتشف ان فيه حتة مش عاجباني زي ما بعمل في اي موضوع او تدوينة بنشرها تقريبا , أو حتى خواطري اللي بحتفظ بيها , معرفش هل ده اسمه تردد وعدم ثقة بالنفس ولا ده طموح دايما اني اكون أفضل؟ مع إني ساعات بقول لنفسي ما جايز اني انزل حاجة للناس دي هتحطني قدام الأمر الواقع ومش هغيّر فيها حاجة ! بس انا اثبتت لنفسي أكتر من مرة انها مبتفرقش خالص .
2- لو كتبت كتاب مش هيكون عن موضوع معين وهيبقى مليان تخبّط وعشوائية وعدم تركيز ,لأنني ببساطة مبعرفش اركّز تقريبا وأي حاجة بركّز فيها جامد بتطلع وحشة جدا ومش مرتبطة ببعض ومش بتعجبني في الاخر ولا بتعجب ناس كتير, انما الحاجات اللي بكتبها بعشوائية وتلقائية بتطلع أفضل "حسب راي الناس" , عارفة ان حد هيرد يقولي (ماهو مش شرط كل اللي تكتبيه يعجب الناس ) وانا معاه طبعا بس هو كمان مش بيبقى عاجبني انا شخصيا مش بس الناس ! ومعرفش برضه ده السبب اللي بيخلي الحاجة متعجبش الناس -إن انا نفسي مش عاجباني- ولا لأ , ثقة الانسان بنفسه بتوصل للناس وبتخليهم يشوفوا حاجات ممكن تكون وحشة انها حلوة جدا لمجرد ثقة اللي عملها بنفسه
3- لو كتبت كتاب عشوائي مواضيعه مش مترابطة مفيش ناس كتير هتشتريه أصلا وتدفع فيه فلوس خصوصا في حاجة متعرفش محتواها من واحدة متعرفش هي مين (ده لو فيه دار نشر قررت تجازف وتنزله اصلا :D ) بيني وبينكم انا شخصيا مش هشتري كتاب كده الا لو كان اللي كاتب الكتاب حد اعرفه وبجامله او هنقسم الارباح سوا او معايا فلوس كتير معرفش اصرفها في ايه :D
4- حتى لو خلاص كتبت كتاب حلو وهنزله وهيعجب الناس معتقدش اني عندي الجرأة أصلا اني اطلع اتكلم عن كتابي كأنه حصيلة خبرة السنين وانه حاجة جامده وانا مليش اي هوية في المجتمع أصلا ! انا بصراحة بيعجبني ثقة الناس اللي زي حالاتي بنفسها لما تنزل كتاب وتبقى بتتكلم عنه بثقة وكده بصراحة عايزة ابقى زيهم بس حتى الان مش نافع ..
5- سبب أخير لعد كتابتي لكتاب إن غالبا كلامي نصه هيبقى غلط وهرجع فيه في يوم من الايام بما فيه الكلام اللي فوق ده كله !! وبصراحة وقتك أيها القارئ العزيز أثمن من اني اضيعه في كلام عن خيالاتي وأفكاري :D
نهاية ممكن اتراجع عن تراجعي عن تأليف كتاب لو حليت لنفسي كل المشاكل اللي كتبتها فوق , أو اني بقيت واحدة مشهورة جدا بحيث ان اي حاجة هكتبها الناس هتحبها وتهلل عشانها :D :D
وبسسسس ^_^ نشكر لك أيها القارئ الصبور اللي استحمل يوصل لحد السطر ده سعة صدرك وروحك الحلوة :)))
قعدت اقلّب في كل اللي كتبته قبل كده في دفاتري وهنا على المدونة لقيت ان أغلب كلماتي مبتورة , تلاقيني كتبت كام كلمة عن الموضوع بعدين فجأة انسى كل اللي بتكلم فيه =) كل الكلام بيخلص فجأة معرفش دي مشكلة من إيه بالظبط ؟ هل ده من ترددي ولا تشتتي وسرحاني ؟ مش عارفة الحقيقة , كل اللي اعرفه انها مشكلة وعايزة اخلص منها ومعرفش ازاي , اللي عارف يقولي ياريت .
أفكار كتير بتدور في دماغي وكلام تايه وسط الزحمة أول ما احاول اوقفها وانظمها بتجري وتكسر الاشارة , طب اعملها ايه دي يعني؟ مكتبش؟ مينفعش , ده مش حل أساساً . طب اعمل إيه؟ ولا حاجة اديني بحاول امسك اللي اقدر عليه منها . عندي قصص وأشعار وأفكار كلها بتلف في دماغي وتايهة , ولما افكر اكتبها ابصلها الاقيها معجبتنيش فمنشرهاش وموريهاش لحد واحتمال اقطعها كمان , ده غباء مني على فكرة الكتابة مش حاجة تكسف حتى لو بكتب وحش وإلا كده عمري ما هتعلم , وبعدين ناس كتير قدراتها متواضعة وبتكتب وثقتها في نفسها بتخليها تطور نفسها وبتخلي الناس تثق فيها كمان .
المهم .. هحاول ومش هزهق , لسة قدامي كتير هحاول اطور نفسي واقنعها تبطل الاستهبال اللي هي فيه ده .. وياريت اللي يقدر يساعدني فيكوا ميتأخرش .. سلامات بقى :))
مبدئيا أنا عارفة ممكن ذكرياتي متهمش حد في حاجة , لاننا منزلتش اساسا لإني مكنتش في مصر كنت في السعودية, لكن انا عايزة اكتبها للتوثيق , وعشان افتكر احلى ايام حياتي بدون مبالغة , حتى وهي صعبة حلوة ,هكتب عن اهم الاحداث واحاسيسي وعن كل شيء في الايام دي ...
بداية يوم 25 يناير ,, كنت في امتحانات أولى ثانوي .كنت مستنية اليوم ده بفارغ الصبر معرفش ليه ,كنت بقول بلساني مش هيحصل حاجة جديدة زي كل مرة هينزلوا حبة هينضربوا ويتقبض عليهم ويروحوا , رغم ان ده كان كلامي بس قلبي كان بيقول حاجة تانية ,قلبي كان حاسس انه فيه حاجة كبيرة هتحصل وان احنا هنتغير , رحت المدرسة يومها الصبح كان عليا امتحانين (جغرافيا واملاء) سبت المراجعة وقعدنا نتكلم انا واصحابي عن اللي ممكن يحصل وعن توقعاتنا وعن امانينا اننا نكون في مصر في اللحظات دي واننا ننزل معاهم بقى , دخلنا الامتحان ورا التاني وانا دماغي في حتة تانية , روحت البيت جريت فتحت التلفزيون اشوف اللي حصل , اقلّب بين قنوات الاخبار , ولا حاجة عن مصر , اقلّب بين قنوات التلفزيون الحكومي , افلام واغاني وطنية بمناسبة قال ايه عيد الشرطة , اقلّب على القنوات المصرية الخاصة الاقي برامج طبخ وافلام عربي ومسلسلات , قلت ايه ده ! هو ايه اللي حصل هو محدش نزل؟؟ رحت فتحت فيس بوك قلت اشوف , الاقي صفحات كتييييييييييييير جدا - منهم لله كلهم - كاتبين التالي : مرة مجموعة شباب قرروا يعملوا ثورة زي تونس راحوا نزلوا لاقوا نفسهم حبة قليلين انضربوا واتقبض عليهم ومعملوش حاجة ,, قلت آه يبقى نزلوا واتلموا وخلاص (وقتها مكنتش عاملة لايك لكلنا خالد سعيد لأن ماما قالتلي ممكن يقبضوا عليكي ,اه والله قالتلي كده ) و بس رحت قفلت ولما اختي جت قلتها ده نزلوا وضربوهم وخلاص ,, قالتلي مش ممكن علطول كده , رحنا فتحنا تاني وشفنا صفحات سياسية لقيناهم بيقولوا لسة محدش نزل لكن اول واحد نزل اتقبض عليه , حمدت ربنا ولقيت حمزة نمرة كاتب انه نازل قلت الراجل ده مش خايف هو مش عارف انه ممكن يتقبض عليه !!, وابتدى بعديها بشوية النزول , ساعتها كان موقع الدستور ابتدى يتابع الاخبار لحظة بلحظة ,ساعتها ظهرت رصد كمان بتتابع الاخبار , ابتدت تتواتر الاخبار من (وحدة الرصد الميداني اللي هي شبكة رصد) وموقع الدستور اللي كان بيتابع الوقفات , كانت اول وقفه بتتابع بتاعة دار القضاء والقصر العيني , اما وقف محمد عبد القدوس وعبد المنعم ابو الفتوح وبلال فضل و محمد غنيم وحمزة نمرة ووائل غنيم ومحمد دياب وعبد الرحمن يوسف وناس كتير و اما انضرب عمرو سلامة .
طبعا كنا نتابع الاخبار على قناة الجزيرة والعربية وبي بي سي العربية ولم تكن هناك اي قناة مصرية تغطي الاحداث , ابتدت الناس تزيد والمسيرات تكتر والقاهرة كلها عساكر لمنع الناس من التجمع , حدثت مناوشات كثيرة حتى تمكن المتظاهرين اخيرا من الوصول لميدان التحرير والاعتصام فيه . كان مشهد عمره ما حصل في مصر وعمري ما شفته , حسيت بحماسة غريبة وبدفعة امل لما شفت الناس متجمعة بقيت بقول : معقول الناس دي ممكن تمشي ؟؟
كان عليا اليوم اللي بعديها امتحان نحو ذاكرتلي كلمتين بالعافية ورجعت اتابع الاحداث , كنا كلنا متجمعين قدام التلفزيون والكمبيوتر بنتابع الاحداث كلنا سعداء ومتفاءلين وبندعي وبنتمنى ان المطالب تتحقق .
لا استطيع ان انسى دور بقية المحافظات التي اشتعلت فيها الثورة , لا استطيع نسيان رمز الصمود .. السويس الباسلة التي بدأت الثورة قبل أي مكان آخر , لا أنسى شكل المظاهرات في السويس بقيادة حافظ سلامة وصفت حجازي , السويس أول من بذلت الشهداء في سبيل مصر ,, رحم الله شهداءنا ورزقهم منازل الصديقين والنبيين والشهداء والصالحين .
لا استطيع ان انسى الاسكندرية والمنصورة وغيرهم من المحافظات التي انتفضت منذ البداية للمطالبة بالحرية والكرامة الانسانية والعيش .
كان هذا يوم الثلاثاء 25 يناير ,, وللحديث بقية ان شاء الله
أترككم مع بعض الصور والفيديوهات
كانت هذه الصورة في محافظتي الأم كفر الشيخ يوم 25 يناير :)
