الأربعاء، 21 ديسمبر، 2011

حكامنا صنع أيدينا


قَالَ المولى عزَّ وجلَّ عن فِرعَون {فَاسْتَخَفَّ قَوْمَهُ فَأَطَاعُوهُ إِنَّهُمْ كَانُوا قَوْمًا فَاسِقِينَ}





نعم نحنُ من نصنع الفراعين , باخْتلِاق الأَعْذارِ لَهُم ,, نُبَرِّر قَتلهم وظُلمهم واستِكبارهم وكَذبهم 


نُبرِّر لَهُم أخْطاءَهم .. نُمَرِّرها ,, نَنْسَاهَا ,, لا نَطْلُب مُحاسَبتهم حتى ,بل نُهاجِم مَن يَطلُب ذلِك !

 نُصدِّق أكَاذيبَهم ,, ألاعيبَهم ,, حتَّى يستخفّوننا ,, يُعامِلونا كضِعافِ العُقُول !

 حتَّى أعْذارَهم وَ حِجَجُهُمْ واهية , غير مُقنِعة ,ساذَجة ,, لكنَّهم لا يهتمُّون

, فقد وَجَدوا مَن يَغفِرُ لَهم ويُبرر لَهم ظلمهم

 .. استخفّونا ,, ونحنُ أطعناهم ,,

 وإذا أراد بَعضُنا إيقاظنا مِن غَفلَتنا والمُطالبةِ بحُقوقِنا


 ,, اتَّهمناهُم بالخيانةِ والعمالةِ وبررنا قتْلَهم وبَرَّرنا لِقاتِلِهم وجلَّادِهم فِعلَه .

لَعنَ الله قوماً ضاعَ الحَقُّ بينَهُمُ



لَعنَ الله قوماً ضاعَ الحَقُّ بينَهُمُ

لَعنَ الله قوماً ضاعَ الحَقُّ بينَهُمُ

لكنّي ورغم كل هذا أؤمن أن للثورة رب يحميها وسيكملها

وللشُّهَدَاءِ رَبٌّ يَرْحَمهم


وللظالمين رَبُّ ينتقم مِنْهم

اللَّهُم ارفَع عنَّا


فقط ملاحظة أخيرة : فِرعَوْن ... كان في مصر !!!

الأربعاء، 14 ديسمبر، 2011

الكفتة توداي: الأونكل على دين السلطة

الكفتة توداي: الأونكل على دين السلطة: يتكرر الموقف بكل دقة كما لو أنه من المقصود به أن يتكرر. كنت عائدا من الميدان، وعلى بعد أمتار من منزلي قابلت أونكل فلان، إنه واحد من أو...

الأربعاء، 7 ديسمبر، 2011

هعمل إيه في الجنة؟؟

النهاردة على تويتر قرر التويب @teeneagle انه يعمل هاشتاج اسمه #heaven2dolist كل واحد يقول فيه اللي هو هيعمله لما يخش الجنة ان شاء الله .. الفكرة دي حمّستني وحمست كتير انهم يكتبوا امنياتهم في الجنة لما يدخلوها ان شاء الله , واهو منه حاجة تزود شوقنا للجنة وتخلينا نعمل اكتر عشان ندخلها ونتجمع فيها بإذن الله , وانا هعيد كتابة تويتاتي هنا عشان تشهد عليا وربنا يحققلي منايا ان شاء الله وأخش الجنة بقى :)))

**يااااااااااااه تخيلوا كده محدش هيضايقنا ولا حد هيموت ونزعل ولا هنحس بالظلم ولا هنمتحن حتى :D الله 

**بفتكر وانا صغيرة اما بابا وماما كانوا بيقولولي اي حاجة بتحبيها هتلاقيها في الجنة وانا اقولهم يعني هطلب بونبوني براحتي خالص :D 

**هشوف سيدنا حمزة بن عبد المطلب :)) الله أنا بحبه أوي :) وهشوف سيدنا البراء بن مالك وهقوله انه بطل عظيم واني بحب اسمه 

**هقابل كل الناس اللي بحبهم أهلي واصحابي واحبائي حتى اللي مشوفتهمش 

** هركب حصان وهجري بالعجلة واطلع اجري براحتييييييييييييييييييي :)) 


**هقابل سيدنا يوسف الصديق بقى :D 

** هقابل السيدة عائشة والسيدة فاطمة وهقولهم انا بحبكم اوي 

** كنت لسة بتخيل امبارح لو كنت مكان السيدة سمية أول شهيدة في الاسلام وان الرسول يقولي : صبرا آل ياسر فإن موعدكم الجنة :)) دنا أموت من الفرحة:)


** نفسي اشوف سيدنا عمر بن الخطاب أوي واشوف سيدنا عثمان بن عفان وأبو بكر الصديق وعلي بن أبي طالب 

** هقابل عمي الله يرحمه وهسلّم عليه وهكلّمه 
**  هطير في الجنة من غير ما حد يقولي بتعملي ايه ,, هطير زي سيدنا جعفر الطيّار :))) 

** متخيلة اني هكون مع الرسول عليه الصلاة والسلام وكل الانبياء :))) مجرد تخيل كده بيحسسني بسعادة :)) اللهم ارزقنا الفردوس الاعلى 

** نفسي اسمع صوت بلال بن رباح رضي الله عنه , واشوف الحبيب بن زيد الانصاري وجفر بن عبد المطلب وعبد الله بن رواحة

**  هشوف الرسول عليه الصلاة والسلام و هقعد معاه واكلمه يااااااااااااه و بعدين هروح عشان اشوف سيدنا يوسف عليه السلام

الجمعة، 28 أكتوبر، 2011

لقد زهقنا .. عن أحداث ماسبيرو

بغض النظر عن من المخطىء  ده مش  موضوعي
الكلام عن الاحداث المشابهة بصفة عامة من ناحية مظاهرات مسيحيين وتحصل فيها أحداث مؤسفة من قتل وتخريب وحرق ,
والتعامل مع مضاعفات الموقف على انه فتنة طائفية والتعامل الرسمي و الشعبي المتكرر مع الاحداث المشابهة
اقولها بصراحة .. انا زهقت من تعاملنا مع مثل هذه الاحداث على انها فتنة طائفية ,مش كل حدث يحصل لمجرد انه يخص فصيل معين يبقى فتنة طائفية
واؤمن بأن مشعلي الفتن هما اللي بيتوقعوا أن أي حاجة سواء كلمة حق أو الواقعية في التعامل مع الاحداث أو حتى عدم المبالغة  بتعمل فتنة فبيتعاملوا بتحسيس زيادة
دايما تلاقي ناس طلعتلك احنا مسلمين وبنحب اخواتنا المسيحيين وكلنا مصريين ويعيش الهلال مع الصليب واللي بيقولوا غير كده دول طائفيين وحشين
وكل الكلام ده اللي بنقوله كل مرة ده ومابيعملش حاجة , بالعكس نفس المشكلة بتحصل. كل مرة !! وده بسبب طبعا اننا بنضحك على نفسنا وبنعيش نفسنا في وهم ملوش معنى مشكلتنا الكبرى إننا مبنحبش نصارح نفسنا بالحقيقة , عارفين يا عم والله ان كلنا مصريين انت مجبتش التايهة يعني ماهي مكتوبالنا كلنا في الرقم القومي الجنسية مصري عادي يعني , والهلال عايش مع الصليب عادي جدا بس فيه ناس تانية بتموت
ده فضلا عن ان الهلال مش شعار الاسلام ولا حاجة (شعار شركة بتنتج مقشات كما يقول م.فاضل سليمان)
لازم نصارح نفسنا شوية , مش كلنا بنحب بعض دي حقيقة, إحنا بنبحث عن المثالية والكمال في كل شيء وده مستحيل , انت مش هتقدر تجبر الناس على انها تحب شخص او طائفة معينة , لكل اسبابه في مشاعره ,ده فضلا عن أن الحب مش شرط للتعايش أصلا , فيه دول كتيرفيها  ناس من مذاهب وأديان مختلفة ومتعايشين فيها سوا وهما مش شرط يكونوا بيحبوا بعض , لازم نضحك على نفسنا شوية احنا عارفين ان فيه مسلمين ومسيحيين بيكرهوا بعض وبيخافوا من بعض , لازم نتعامل من هذا المنطق مش نحط فكرة ان الحياة لونها بمبي وبعدين نتصدم في الاخر , نفسي نكون صرحاء مع نفسنا وبعضنا مرة واحدة بس , اه انا بكرهك وانت بتكرهني بس احنا الاتنين عايشين في البلد دي واللي هيجرا عليها هييجي عليك وعليا فلازم نتفق ونشتغل ونفكر سوا عشان مصلحتنا ومصلحة البلد دي .


حاجة تانية الناس المسلمين اللي بتخاف تقول الحق عشان ميعملوش فتنة طائفية هما اول من بيعمل الفتنة دي , لو عايز كله يتساوى في البلد دي قول ان ده غلطان ايا كان دينه , قول الحق , الكدب على الغلطان مش حل وبيخليه يتمادى في غلطه , ده غير انك بتستفز ناس تانية شايفينه غلطان وبتشحنها ضده وأما بتحصل مشكلة زي أحداث ماسبيرو بيكون فيه ناس أصلا مشحونة ضد القضية وبتبرر العنف معاهم
وهو ده اللي عندي والسلام عليكم 

كُتِبَ يوم 12\10

الأربعاء، 12 أكتوبر، 2011

من ذكرياتي مع الثورة : نوت كتبتها يوم 4 فبراير في عز المعمعة

هذه التدوينة كتبتها ايام الثورة على الفيس بوك للجماعة بتوع اسفين ياريس وخلينا نستنى ست شهور والناس اللي كانت بتشتم في الثورة 
كتبتها للناس اللي عندي واعتز بها جدا لانها كانت في عز المعمعة وكتبتها وانا صادقة في كل حرف فيها :))
حطاها هنا للتوثيق ولسد الخانة برضه بدل ما المدونة تفضل فاضية :P 
**********************************


طبعا انا مش هتكلم بصفتي محلل سياسي و لا حاجة م الكلام ده انا هتكلم عادييييي جدا كام كلمة حبيت اقولهم عشان ناخد بالنا من كلامنا كويس اوي

الناس اللي عمالة تقول ان مبارك هو رمز الامان و كان معيشنا ف امان و سلام و حمام انا عايزة ابينلهم حاجة 
أولا : مينفعش تقول انه هو رمز لاامان و هو اللي معيشنا ف امان لان الامان ده نعمة من عند ربنا مش من عنده و هو لايتفضل علينا بها بل المتفضل هو ربنا ماشي
ثانيا : ربنا قدر ان الكلام ده كله يحصل عشان فيه نعم كتيرة هو منعم علينا بيها سبحانه احنا ناسينها و مبنحسش بيها و مبنشكرهوش عليها
عشان كده لازم نقول الحمد لله على نعمة الامن و الامان 
الحمد لله الذي اسبغ علينا نعمه ظاهرة و باطنة
ثالثا : ربنا لايام ابتلانا ( او ابتلاكم عشان محدش يقولي اتلهي انتي مش قاعدة ف البلد و لا حاسة بحاجة ) بالاحساس بعدم الامن عشان نفتكر اخوانا و اخواتنا اللي في فلسطين و غيرها من الدول اللي عايشين كده من اول يوم ف حياتهم فلازم برضه نقول : الحمد لله

تاني حاجة بقى محدش يقعد يقول ع الناس اللي عملت مظاهرات جتكم القرف خربتوها و قعدتوا على تلها و استحليتوها و لزقتوا و منتوش ماشيين طب ماهو الراجل اهو عمل اصلاحات و حاجات حلوة و يعني و كده و بتاع
احب اقولكم ان الناس دي مطلعتش كده رخامة الناس دي طلعت بعد ما خلااااااااااااااااااااااااااص فاض بيها من كتر الوعود و احنا لازم نحس بيهم لانه مش معنى ان ربنا منعم علينا و ممريناش باللي مرو بيه نقسى عليهم
الناس دي فيها اللي اهله ماتوا ف العبارة و محدش عبرهم و فيها اللي ماتوا ف اي حتة نتيجة خطأ او اهمال او غيره
او اللي متخرج و عاطل بقاله كاااااااااااااااام سنة
او اللي بدفع ضرايب قد كده على كل نفس بيتنفسه
او اللي 6 و 7 افراد و عايشين كلهم ف اوضة و مناطق عشوائية
لازم نحس بالناس ةو نحمد ربنا ع النعم اللي احنا فيها و نظرتنا متبقاش قاسية و نقول طب ميروح يشتغل ولا مش عارفة يعمل ايه
قولوا الحمد لله على النعمة اللي احنا فيها و بس
ربنا بيورينا بالاحداث دي ان لكل شيء تمن
اللي عايز النصر لازم يقعد بالشهور يتدرب و يتعب
اللي عايز ينجح لازم يقعد يذاااكر طول السنة
اللي عايز يتخلص من الظلم لازم يضحي
اللي عايز يدخل الجنة لازم يعمل عشان كده
عشان يحس بحلاوة النصر

اللي بيقول بقى ماهي كل دولة فيها فقر و قرف و البلاد كلها ماهم حكامها مش ملايكةو مفيش حد كامل و الراجل عمل حاجات حلوة كتير عشان مصر 
اولا : من واجبه انه يعمل حاجات كويسة لان دي مسؤوليته مش فضل منه علينا
ثانيا : مش معنى انه عمل حاجات كويسة اننا ننسى الحاجااااااااااااات الوحشة اللي حصلت كلها
(( كلكم راع و كلكم مسؤول عن رعيته ))
عمر بن الخطاب رضي الله عنه كان بيمشي ف البلاد يتفقد احوال الناس بنفسه
كان يخاف انه يجري ظلم على اي حد ف اي حتة في نطاق حكمه لان ربنا هيساله عن كل صغيرة و كبيرة
كان - رضي الله عنه - لا ينام اليل خوفا انه يغفل عن بلاده
عمر بن عبد العزيز اللي وصلت الدولة في عهده لعصر ذهبي لم يمر على احد في الدنيا
مكانش فيه ولا فقير في بلاده اللي كانت من الشرق للغرب !!!
ولا فقييييييييييير كانوا العاملين على الزكاة بيمروا ع البيوت بالزكاوات مكانش حد بياخدها لان الناس مش محتاجة !!!!
عارفين وصل لده ازاي ؟؟؟؟
بحاجات كتيييييييييييييييير اهمها انه الاراضي و الممتلكات اللي كان بياخدها بنو امية اللي هما عيلته بدون وجه حق كان بياخدها منهم
........................
ان كنت عايزة اقول حاجة تانية ف غالبا نسيتها :)) 
بس كفاية رغي كده بقى و مع السلاااااااااااااااااااااااااامة :))
ربنا يحفظ مصر من كل سوء