الخميس، 19 أبريل، 2012

كلمتين عالماشي


قعدت اقلّب في كل اللي كتبته قبل كده في دفاتري وهنا على المدونة  لقيت ان أغلب كلماتي مبتورة , تلاقيني كتبت كام كلمة عن الموضوع بعدين فجأة انسى كل اللي بتكلم فيه =) كل الكلام بيخلص فجأة معرفش دي مشكلة من إيه بالظبط ؟ هل ده من ترددي ولا تشتتي وسرحاني ؟ مش عارفة الحقيقة , كل اللي اعرفه انها مشكلة وعايزة اخلص منها ومعرفش ازاي , اللي عارف يقولي ياريت .
أفكار كتير بتدور في دماغي وكلام تايه وسط الزحمة أول ما احاول اوقفها وانظمها بتجري وتكسر الاشارة , طب اعملها ايه دي يعني؟ مكتبش؟ مينفعش , ده مش حل أساساً . طب اعمل إيه؟ ولا حاجة اديني بحاول امسك اللي اقدر عليه منها . عندي قصص وأشعار وأفكار كلها بتلف في دماغي وتايهة , ولما افكر اكتبها ابصلها الاقيها معجبتنيش فمنشرهاش وموريهاش لحد واحتمال اقطعها كمان , ده غباء مني على فكرة الكتابة مش حاجة تكسف حتى لو بكتب وحش وإلا كده عمري ما هتعلم , وبعدين ناس كتير قدراتها متواضعة وبتكتب وثقتها في نفسها بتخليها تطور نفسها وبتخلي الناس تثق فيها كمان .
المهم .. هحاول ومش هزهق , لسة قدامي كتير هحاول اطور نفسي واقنعها تبطل الاستهبال اللي هي فيه ده .. وياريت اللي يقدر يساعدني فيكوا ميتأخرش .. سلامات بقى :))

الخميس، 12 أبريل، 2012

كرّاسة المصطلحات

حرية التعبير : هي أن يكون لمسؤول الحكومة كامل الحق أنّه "يعبّرك " أو إنه يسيبك منك للحيط


الديمقراطية : لك الحق أن تقول رأيك بكل حرية , وللضابط أن يقتلك بكل حريّة برضه

فوتوشوب : كلمة أعجمية تستخدم لتبرير سحل الفتيات وقتل المتظاهرين ودهس الأبرياء وكتابة بيانات المجلس العسكري على فيس بوك

الأغلبية الصامتة : هم قلّة من البشر لهم متحدث رسمي وبيانات ومؤتمرات كمان .

ميدان العباسيّة : هو ميدان يتظاهر فيه مجموعة من البشر اعتراضاً على التظاهر في مكان آخر .

المحلل الإستراتيجي : شخص شاف شغله وجع دماغ قرر إنه يسيبه ويوجع دماغ الناس

الناشط السياسي : شخص نشيط جدا جدا بيشتم كل السياسيين .

الشعب يريد : كلمة صهيونية متقولهاش تاني يا شاطر 

الثورة : وجهة نظر 

الثورة المضادة : هو اللي بنعمله في الناس هيطلع علينا ولا إييه 

************************
ملحوظة : التدوينة قديمة بعد الشيء وتسارع الأحداث في هذا البلد العجيب هيحسسك وانت بتقراها انها وثيقة من عهد الفراعنة :)