قعدت اقلّب في كل اللي كتبته قبل كده في دفاتري وهنا على المدونة لقيت ان أغلب كلماتي مبتورة , تلاقيني كتبت كام كلمة عن الموضوع بعدين فجأة انسى كل اللي بتكلم فيه =) كل الكلام بيخلص فجأة معرفش دي مشكلة من إيه بالظبط ؟ هل ده من ترددي ولا تشتتي وسرحاني ؟ مش عارفة الحقيقة , كل اللي اعرفه انها مشكلة وعايزة اخلص منها ومعرفش ازاي , اللي عارف يقولي ياريت .
أفكار كتير بتدور في دماغي وكلام تايه وسط الزحمة أول ما احاول اوقفها وانظمها بتجري وتكسر الاشارة , طب اعملها ايه دي يعني؟ مكتبش؟ مينفعش , ده مش حل أساساً . طب اعمل إيه؟ ولا حاجة اديني بحاول امسك اللي اقدر عليه منها . عندي قصص وأشعار وأفكار كلها بتلف في دماغي وتايهة , ولما افكر اكتبها ابصلها الاقيها معجبتنيش فمنشرهاش وموريهاش لحد واحتمال اقطعها كمان , ده غباء مني على فكرة الكتابة مش حاجة تكسف حتى لو بكتب وحش وإلا كده عمري ما هتعلم , وبعدين ناس كتير قدراتها متواضعة وبتكتب وثقتها في نفسها بتخليها تطور نفسها وبتخلي الناس تثق فيها كمان .
المهم .. هحاول ومش هزهق , لسة قدامي كتير هحاول اطور نفسي واقنعها تبطل الاستهبال اللي هي فيه ده .. وياريت اللي يقدر يساعدني فيكوا ميتأخرش .. سلامات بقى :))
آجمل حاجه في الكاتب انه يكون ذاتي بيكتب في الاساس عشان يرضي نفسه مش عشان يرضي حد تاني
ردحذفطب لو الحاجات اللي بيكتبها رضاه عنها لحظي وبعدين بتبقى مترضيهوش هو شخصيا يعمل ايه ؟ :))
حذف