الاثنين، 9 يوليو 2012

لماذا لم أؤلف كتاب؟؟

ملاحظة : هذا الكلام فضفضة شخصية ملوش اي أهمية في الكون لو حضرتك مش حابب تقراه براحتك يعني :))


طبعاً بما إني شخص مهم جداً بالنسبة لنفسي كنت بسألها كتير أوي عن سبب تراجعها عن فكرة كتابة كتاب , ونظراً لضغطي على نفسي في الاجابة قررت انها ترد عليّا بصدر رحب وتقولي أسبابها :

1- أنا لو نزّلت كتاب هقرر اسحب النسخ اللي موجودة منه في السوق كل أسبوع عشان كل شوية هكتشف ان فيه حتة مش عاجباني زي ما بعمل في اي موضوع او تدوينة بنشرها تقريبا , أو حتى خواطري اللي بحتفظ بيها , معرفش هل ده اسمه تردد وعدم ثقة بالنفس ولا ده طموح دايما اني اكون أفضل؟ مع إني ساعات بقول لنفسي ما جايز اني انزل حاجة للناس دي هتحطني قدام الأمر الواقع ومش هغيّر فيها حاجة ! بس انا اثبتت لنفسي أكتر من مرة انها مبتفرقش خالص .

2- لو كتبت كتاب مش هيكون عن موضوع معين وهيبقى مليان تخبّط وعشوائية وعدم تركيز ,لأنني ببساطة مبعرفش اركّز تقريبا وأي حاجة بركّز فيها جامد بتطلع وحشة جدا ومش مرتبطة ببعض ومش بتعجبني في الاخر ولا بتعجب ناس كتير, انما الحاجات اللي بكتبها بعشوائية وتلقائية بتطلع أفضل "حسب راي الناس" , عارفة ان حد هيرد يقولي (ماهو مش شرط كل اللي تكتبيه يعجب الناس ) وانا معاه طبعا بس هو كمان مش بيبقى عاجبني انا شخصيا مش بس الناس ! ومعرفش برضه ده السبب اللي بيخلي الحاجة متعجبش الناس -إن انا نفسي مش عاجباني- ولا لأ , ثقة الانسان بنفسه بتوصل للناس وبتخليهم يشوفوا حاجات ممكن تكون وحشة انها حلوة جدا لمجرد ثقة اللي عملها بنفسه

3- لو كتبت كتاب عشوائي مواضيعه مش مترابطة مفيش ناس كتير هتشتريه أصلا وتدفع فيه فلوس خصوصا في حاجة متعرفش محتواها من واحدة متعرفش هي مين (ده لو فيه دار نشر قررت تجازف وتنزله اصلا :D ) بيني وبينكم انا شخصيا مش هشتري كتاب كده الا لو كان اللي كاتب الكتاب حد اعرفه وبجامله او هنقسم الارباح سوا او معايا فلوس كتير معرفش اصرفها في ايه :D

4- حتى لو خلاص كتبت كتاب حلو وهنزله وهيعجب الناس معتقدش اني عندي الجرأة أصلا اني اطلع اتكلم عن كتابي كأنه حصيلة خبرة السنين وانه حاجة جامده وانا مليش اي هوية في المجتمع أصلا ! انا بصراحة بيعجبني ثقة الناس اللي زي حالاتي بنفسها لما تنزل كتاب وتبقى بتتكلم عنه بثقة وكده بصراحة عايزة ابقى زيهم بس حتى الان مش نافع ..

5- سبب أخير لعد كتابتي لكتاب إن غالبا كلامي نصه هيبقى غلط وهرجع فيه في يوم من الايام بما فيه الكلام اللي فوق ده كله !! وبصراحة وقتك أيها القارئ العزيز أثمن من اني اضيعه في كلام عن خيالاتي وأفكاري :D

نهاية ممكن اتراجع عن تراجعي عن تأليف كتاب لو حليت لنفسي كل المشاكل اللي كتبتها فوق , أو اني بقيت واحدة مشهورة جدا بحيث ان اي حاجة هكتبها الناس هتحبها وتهلل عشانها :D :D

وبسسسس  ^_^  نشكر لك أيها القارئ الصبور اللي استحمل يوصل لحد السطر ده سعة صدرك وروحك الحلوة :)))

هناك 6 تعليقات:

  1. عن نفسي, بشتري كتب بيبقى محتواها خواطر أو عدة مواضيع صغيرة ممكن لا تمت لبعضها بأي صلة.
    دي كتب بتبقى خفيفة ع النفس وف أي وقت وف أي مكان تحبي تفتحي أي صفحة وتمخمخي (بدون ما تبقي مقيدة بالقراية من الألف للياء عشان تفهمي المؤلف بيقول ايه).

    لو هتكتبي كتاب كدة أنا أول مشجع ليك :)

    ردحذف
  2. وعشان حكاية إنك هتتراجعي عن أفكارك, كتير مؤلفين كتبوا ونشروا ورجعوا تراجعوا عن حاجة شافوا إنها مكانتش ناضجة قوي ف الوقت اللي اتنشرت فيه.

    يعني مش هتكوني أول وحدة ولا حاجة :) عادي جدا

    ردحذف
    الردود
    1. شكرا أولا على ردك واهتمامك باللي كتبته :)) ثانيا معاكي حق في موضوع خفيفة عالنفس ده بس بصراحة الناس بتستخسر تشتري تقولك اقراه عالنت :D

      وشكرا كمان مرة عشان اديتيني قدر من الثقة في نفسي الواحد محتاج ناس زيك كتير :))) ^_^

      حذف
  3. بسم الله الرحمن الرحيم

    أسلوبك في التعبير عن نفسك حلو ماشاء الله يا مي جدا وبيبشر انك ممكن تعملي كتاب في المجال اللي هتختاريه لنفسك ان شاء الله :))

    وبالنسبة لانك كل شوية هتكوني عايزة تعدليه فده طبيعي جدا على فكرة وهتلاقي كل طبعة من نفس الكتاب متطورة عن اللي قبليها ومنقحة أكتر والتطوير مهم بس محاولة الوصول للكمال حلوة بس متبالغيش أوي فيها

    أما حكاية المواضيع العشوائية فكون في كتاب فيه مواضيع كتير مش شرط انه يأثر على مبيعاته ده غير أساسا ان العشوائية دي أعتقد انها حاجة مؤقتة ولما تختاري تخصص هتلاقيه خد اهتمامك أكتر حاجة ولما تعملي كتاب هتلاقيه غالبا متخصص بس عموما كتاب متنوع أعتقد انه يكون لذيذ :))

    بالنسبة للجرأة بقى فدي الواحد مبيتولدش بيها ممكن تلاقي نفسك في الأول متوترة والحاجات دي بس بعد كده خلاص لأنك أساسا ما شاء الله متحدثة كويسة وبعدين متخافيش أنا هبقى بشجعك باذن الله :))

    أما بقى الرجوع في الرأي أو كده فده عادي جدا ناس كتير أوي مشهورين وبنحترمهم عرفنا انهم كانوا متشددين في صغرهم وغيروا آراؤهم لما كبروا وسمعت عن ناس نزلت كتب وبعدين غيرت رأيها ومطبعتهاش تاني فدي مش مشكلة خالص :))

    الخلاصة : انتي لو عملتي كتاب سواء كان متخصص ولا عشوائي تراجعتي عنه بعد كده أو لأ طورتيه كذا مرة أو سبتيه أنا متأكدة انه باذن الله هيكون شيء جميل ومميز لأنك ليكي فكر حلو وانتي مميزة ما شاء الله عليكي :))

    ردحذف
    الردود
    1. مبدئياً شكرا يا رافعة معنوياتي دائما وأبدا على الكلام الجامد ده :)) أنا اقتنعت بصراحة مش لاقية كلام أقوله .. شكرا عالرد يا رفيقة الكفاح :D

      حذف
    2. هههههههههههههههههههههههههههه أي خدمة احنا رفقاء كفاح برضو :)) ربنا يديم المحبة فيه يا رب :))

      حذف